Leseprobe Bänziger lügt! - Flipbook - Seite 10
het Hemmli u Hose packt u isch us der Schlafstube ghumplet, weu
ihm uberflüssigerwys ono der rächt Scheich isch ygschlafe gsy.
«Puretrampel», «Hungerlyder» u weiss der Herr was aues het
ihm d Vontobler am Namitag a Chopf pängglet, wo er seye im
Dorf unger zuefällig gchrüzt het.
Es passt ihm gar nid i sys Oberstübli, dass dä herrisch Totsch
ihm gäng ume so verbychunnt. Syt fasch dryssg Jahr isch er de
itze Bewirtschafter vom Schlossguet u het weiss Gott aus
Möntschemügleche gmacht, zum auneort z Beschte usezhole.
Eifach isch das nümme. D Landwirtschaft särblet, das gspürt o
Reischt Hans, obwohl er eine vo de grössere Puure ir Region isch.
Aber nie u niene wott d Bsitzere investiere, für jedi no so
dringendi Reparatur am Huus muess er uf de Chnöi umerütschte.
U jedes Mal, wenn er probiert, sech em Markt chli aazpasse u
öppis Nöis z wage, git di altmodisch ygstellti Bsitzere ire unnötig
Sänf derzue, bis ihm di eigete Idee verleide. Derfür steit si ständig
mit der hohle Hang vor em Loch u wott Profit gseh. Profit u
nomau Profit. Ja, u itze isch si ihm für all di Müej derewäg ubers
Muu gfahre. Zum Tüfu söll er gaa, het si töberet. Mitsamt sym
ganze Pack. Furt, abfahre! Si fingi sicher öppis Bessers. Das syg
nämlich kes Problem.
Wi vorhär, wo er het i Stall gluegt, wott ihn ds Sälbstmitleid o
itze ume schier erdrücke. Wohäre sött er o gaa, we di Vontobler
plötzlich ärnscht miech u ihm tät chünte. Er weiss ke vernünftegi
Antwort. Aber wüeschti Gedanke schiesse wild u chrüz u quer dür
si Bire.
Nid, dass er sech nid wär gwanet gsy, heftige Stryt mit der
Vontobler z ha, aber am Namitag im Dorf nide, ja, da het si ihm z
10
