Leseprobe Bänziger lügt! - Flipbook - Seite 15
aber si het sehr früeh glert, kener Emotione z zeige. Und scho gar
nid Bedienschtete gägenüber. Ire isch allerdings nid entgange,
dass di beide Lüt seye in letschter Zyt scho fasch unverschämt
fräch tüe muschtere und beobachte. Vor allem d Sophie muess si
fasch täglich i d Schranke wyse, wöu di Frou, wo chli öppis elter
isch als si sälber, ufsässig und nachlässig worde isch. Und
nöischtens sogar d Türfalle ohni Handschue aalängt. Öppis, wo si
fasch nid chan ertrage! O ir Chuchi fuerwärchet d Sophie
unerchanter als früener, polteret und schletzt Züg desume,
schlycht dür d Gäng und blybt fräch vor Türene staa, ganz
bsundersch denn, we si Bsuech vom Dr. Carl Fischer het.
Und si het sech ou scho mehrmals gfragt, was i Gärtner chönnti
gfahre sy. Er isch scho immer e misstrouische, zuegchnöpfte
Mürggel gsy, aber i letschter Zyt isch er no sonderbarer worde.
Ds Einzige, was dä Kärli in letschter Zyt freiwillig het
fürebrösmelet, isch di unverschämt Frag gsy, öb er grad Ändi
Ouguscht und Aafang Septämber chönnti frei ha, um em Brueder
ga z hälfe bym Härdöpfel ärnte. Si schüttlet der Chopf.
«Scandaleux!»
Si het aber de doch widerwillig zuegstimmt, obwohl si
vermuetet het, dass Samuel dä Usflug vor allem drum wetti
mache, um sech nöii Schnapsvorrät z bsorge. Es passt ire gar nid,
dass ire Gärtner mit zuenähmendem Alter zum regelrächte
Schnapssüffel wird. Aber Samuel cha stur sy wine Bock, und si
chan und wott das Risiko nid ygaa, dass er plötzlich ire Stimmig
vo Entzug und Wuet der Bättel wirft und verreiset. Das tät si ihm
zuetroue. Und wohär sött si de e nöie Gärtner nää, e flyssige,
subere, wo schwygt und nid im Züg umelaveret?
15
