Leseprobe Bänziger lügt! - Flipbook - Seite 18
bländend us, di aagraute Haar sy grad früsch gschnitte, der Aazug
us dunkelblauer Syde, wo er mit ere uffällig hällblaue Grawatte
kombiniert het, sitzt ihm wi aagosse und löö syner grosse, blaue
Ouge laa erstrahle.
Incoryable, dänkt d Charlotte Vontobler, er isch chuum jünger
als ig und gseht so ungemein früsch und läbesfroh us. Fasch hätti
si sech la gaa und wäri ihm um sy Hals gfalle. Aber im letschte
Momänt rysst si sech zäme, presst ires schmale Muu zure dünne
Linie und ringt um Haltig.
«Carl, s’il te plaît, setz di», seit si styf. Er blybt staa und
strahlet si aa.
«Ma chère, wele Vorfahre isch de hüt dürs Schloss geischteret,
dass d Sophie sone Chopf macht?», fragt er und lachet
verschwörerisch.
Es het Momänt gää ir Charlotte Vontoblers Läbe, wo si by so
ere Aaspilig hätti schallend mitglacht. Aber dasmal blybt iri Myne
hert wi Stei.
Der Dokter Carl Fischer, wo so gärn e Dokter Carl Vischer
wäri, isch Profi gnue, um sofort umzstelle und uf extrem
yfüelsame Awalt z mache. Er geit e sehr behutsame, vorsichtige
Schritt uf d Charlotte zue und strycht ire mit em krümmte
Zeigfinger vo syre lingge Hand fyn über d Backe: «Charlotte, ma
chère, was um Gottes Wille isch passiert?»
Sekunde später starrt er mit versteinereter Mine uf di toti Chatz
und lost sech irer stockende Schilderige aa.
«Hesch e Verdacht, ma chère?», fragt er lysli.
18
