Leseprobe Bänziger lügt! - Flipbook - Seite 19
D Charlotte, wo sech mittlerwyle uf ene Sässel het niderglaa,
zuckt mit de Schultere. «Ig ha dir bi dym letschte Bsuech ja vo
mym Stryt mit em Reischt verzellt», seit si tonlos.
Er muschteret seye es Zytli. Wi müed und verbitteret si
usgseht, dänkt er. Si isch doch einisch e attraktivi Frou gsy, chlyn
und zierlich, mit längem, blondem Haar, wo si meistens sehr
kunstvoll het ufgsteckt gha.
Itze sy irer Haar fasch grau. Und bi Froue, dänkt er spöttisch,
isch das eifach nid halb so attraktiv wi bi üs Manne. Und als ob
das nid gnue wäri, het si irer graue Fäde o hüt zumene stränge
Zöpfli gflochte, wo straff a irem Hinderchopf hanget. Irer fyne
Gsichtszüüg vo früecher sy nume no hert und unnachgibig, irer
hällblaue Ouge starre wässrig us töife Ougehöhline und ires
schmale Muu gseht meh vor luter Falte mängisch fasch nümm.
Wi usgschwemmti Karschtfälder, dänkt er.
Der Carl Fischer setzt innerlech e töife Süfzger ab. Nume irer
Chleider sy o hüt tadellos, ds Parfum wi scho früener sehr dezänt
und fein. Am Gruch naa chämi er nie uf d Idee, dass er e Frou vor
sech het, wo di beschte Jahr mit emene gwaltige Gump het hinger
sech glaa.
Wi immer treit si o a däm Tag es paar Stück Familieschmuck,
settige, wo längschtens us der Mode isch ir Stadt. Aber der Carl
hätti sech ghüetet, so öppis jemals z erwähne. Der Wärt zellt,
dänkt er chli schelmisch und muschteret z Guld und d Saphire und
ds Amulett mit em Familiewappe.
Er macht e töife Schnuufer, so, dass mes ghört. Syni Stimmig
passt sech ganz outomatisch der Klientin aa. Derby het er so e
gueti Luune! Scho am Morge früech het er mit syre künftige Frou
19
