Leseprobe Bänziger lügt! - Flipbook - Seite 20
paar Churznachrichte chönne ustuusche. Und si het o nid «Nei!»
gseit zum Aatrag, wo er ire vor paar Täg gmacht het, obwohl er
chli het Angscht gha. Und es isch ihm eigentlich de doch kommod
cho, dass ihn syni liebi Fründin und Klientin scho ume het häre
zitiert. So het er d Wartezyt uf syni Zuekünftig chönne überbrügge
und wahrschynlech ou ume vergulde. Scho vor zwöi Täg het ihn
d Charlotte ybstellt. D Strytluscht vor Charlotte isch gross und der
unbestrittnig Houptgrund, warum syni Kanzlei so bländend louft.
Er reckt sech und suecht im Fänschterglas sys gepflegte
Antlitz. Er isch meh als z fride mit däm, was er gseht. D Tatsach,
dass scho sy Vater Awalt vo der Familie Vontobler gsy isch, het
ou ihm e sehr erläsni Klientel bbracht. Ja, d Charlotte Vontobler
isch eidütig der Schlüssel zum Erfolg. In jedere Hinsicht!
«Ach ja, genau, wenn isch scho ume dä hässlech Stryt mit em
Reischt gsy?», fragt er ändlech und sitzt gägenüber der Charlotte
ufs Fauteuil. «Und wenn hesch du, ma chère, der Sir John zum
letschte Mal gseh?»
D Charlotte runzlet d Stirn und luegt am Awalt verby, use i
Park.
«Ach, du weisch doch, wi er isch, im Summer isch er mängisch
tagelang uf der Walz, dä alt Casanova.»
Der Carl faat aa, chli aazüglech z grinse, tschegget aber im
letschte Momänt, dass dumms Glächter unpassend isch und würgt
drum syner Gfüel abe, wo er gseht, wi irer Ouge gefährlich
ufblitze.
«Excuse-moi, Charlotte!»
Sider er i irne Kreise darf vercheere, bedient er sech liebend
gärn der französische Sprach, wöu er doch weiss, wi sehr di
20
