Leseprobe Bänziger lügt! - Flipbook - Seite 22
Nei, ihm ligt ganz und gar nüt ar Fründschaft mit em Bänziger,
aber dä Maa isch halt eifach scharf druf, i syne Kreise Fuess z
fasse. Und wöu ei Hand di anderi wäsche tuet, spilt er bi däm
Grusustückli mit.
«Carl! Losisch du mir überhoupt zue!»
Er Charlottes beleidigti Stimm holt ihn us syne Gedanke
zrugg. «Ja, bitte. Sorr&, ähm, exgüsee, was seisch, söll ig d
Polizei rüefe?»
«Mais non, Carl! Für was? Es längt, we du dir der Reischt
vorchnöpfe tuesch!»
«Ja, er isch wohl der Einzig, wo zu so öppis fähig isch», seit
der Carl zuestimmend. «Ig dänke, dass es itze sofort Zyt isch, dass
du dir Gedanke über d Zuekunft vo dyne Länderei machsch, mi
Liebi! Hesch scho jemals dra dänkt, dass mir chönnte
verchoufe?» Er het Sorg, dass er das sehr behuetsam formuliert.
Si luegt ihn unglöibig aa, ires schmale Müüli wird grad no es
Jota schmaler: «Carl, mais non! Incroyable! Ig bitte di! Das isch
nid dyn ärnscht! Nie, gar nie wirde ig mys Erb zerstückle wi, wi»,
si suecht nach Wort, «wine billegi Wurscht!»
Si ringt nach Luft und faat aa, sech i Raasch z rede: «Wenn ig
das hätti wölle, de hätti ig mys Land schon vor Jahre a ds Militär
verchouft! Du weisch doch, wi sehr sech d Cavallerie hie immer
wohl gfüelt het! »
«Chérie, aber das isch Jahrzähnte här. Es git kei Cavallerie
meh. Leider.»
«Zsss, das weiss ig», korrigiert si ihn barsch. «Ig bi nid vo
geschter! Aber ds Militär het ou angeri Standbei, wo guet hie häre
hätte passt. Aber das Klapper vo de Huuf fählt mir trotzdäm.»
22
