Leseprobe Bänziger lügt! - Flipbook - Seite 24
«O ja, das isch si», erwideret d Charlotte. «Si het sy Liechtsinn
gerbt. Aber si wird älter und ryfer und ig bi sicher, dass si eines
Tages zur Bsinnig cho wird. Aber la üs nümme länger vor Isabella
rede, Carl. Wi ou gäng si isch, i ha kei anderi Wahl. I wott nid,
dass mys Erbe eines Tages i frömdi Händ chunnt, drum wird das
Meitschi mi ganz Bsitz erbe! Aber das geit hoffentlich no sehr,
sehr lang», seit si und der Carl gseht, wi es zögerlechs Lächle über
ires graue Gsecht huschet.
Er erwideret ds Lächle sofort, geit uf si zue, zieht si galant zu
sech häre und git ire e flüchtige Kuss ufs Haar.
«Du hesch rächt, mir sötte üses Alter nid däwäg überbewärte.
Und mir löö üs vo däm Pöbel da usse nid la z Läbe schwär mache,
gäll! Si wärde immer und immer wider Steine finde, wo si üs chöi
i Wäg lege, gäll. Aber es wäri ja glacht, wenn mir mit dene Puure,
Arbeiter und Husfroue nid würde fertig wärde!»
Si nickt und betrachtet ume di toti Chatz. «Ig wirde di räche,
mi guet Sir John! Reischt muess zahle! Carl, ig möcht, dass du di
no hüt ganz intensiv mit der Nöibsetzig vom Schlossguet tuesch
beschäftige.»
«Sälbstverständlech, Charlotte. Aber laa üs i Garte gaa, um d
Einzelheite z bespräche. Und was der Sir John betrifft: Du bisch
dir würklech sicher, dass ig d Polizei nid sölli rüefe?»
«Oui, bien sûr! Ig wott kes Gred, und je meh Lüt vo däm
grouehafte Malör wüsse, desto schlächter für mi», antwortet si
bestimmt.
Er nickt. «Füelsch du di hie no sicher? Oder söll ig für paar
Täg ganz hie blybe?»
24
