Leseprobe Bänziger lügt! - Flipbook - Seite 27
hei si scho gseit, es stöngi e ghörige Wätterumschwung bevor. Mit
däm Prachtsummer, het das Frölein vom Meteodach gseit, göngis
itze z Änd. Das gloubt der Dr. Bluem uf Aahieb, itze, wo er under
de Loube steit u umeluegt. Es schmöckt nach Herbscht.
Der alt Dokter luegt uf di anderi Strassesyte und gseht, wine
jungi Mueter mit zwöi Chind uf die Tür zuestüüret, wo er fasch
50 Jahr isch y- und usgange. Es isch syni ehemalegi Praxis, wo
itze vomene junge Arzt gfüert wird. Er, der Norbert Bluem, het
scho Angscht gha dazumal, dass er nie würd e Nachfolger finde.
Aber de het sech e junge Maa usere andere Stadt uf sy Annonce
gmäldet. Und der Dokter Bluem isch meh als nume glücklich über
di Löösig worde. Mit bald Sibezgi isch er i Ruhestand und het
sech gfröit, mit syre Ehefrou no es paar schöni Jährli z gniesse.
Aber es isch anders cho. Churz nachdäm er d Praxis het übergää
gha, het d Lisette e Chräbs-Diagnose übercho und isch nume es
halbs Jahr speter gstorbe. Und er, der beliebt Dokter Bluem, het
ire nid chönne hälfe.
Er blybt staa, steit unschlüssig vo eim Fuess ufe ander und
wüscht sech e Träne usem Oug, wo Aastalte mache wott, fräch
über syni Backe z rugele. Es het kei Sinn, hadere nützt nüt!
Schicksal! Wi mängisch het er als Arzt das müesse erläbe, wi
mängisch het er müesse schlimmi Brichte wytergää und hinderhär
tröschte. Und itze? Mit em Wüsse, dass er und d Lisette fasch
füfzg wunderbari Jahr hei dörfe zäme ha, tröschtet er sech und
probiert syt eme Jahr, es einigermasse guets Räntner- und
Witwerläbe z führe.
Mit paar Patiänte pflegt er no hüt Fründschschafte. Und die
geit er ab und zue ga bsueche, zum us der Wohnig use z cho. Gäng
27
