Leseprobe Bänziger lügt! - Flipbook - Seite 28
denn, wenn ihn d Längwyli und Truur wei uffrässe, studiert er
dranne ume, wohäre er z Visite chönnti.
O a däm Morge Ändi Ougschte, hei ihn d Schmärze und d
Melancholie scho gly us de Fädere bugsiert und scho bym Gaffee,
wo er sech als erschts het gmacht, isch er zum Schluss cho, dass
er ume einisch ufs Land chönnti fahre und er Charlotte Vontobler
chönnti gaa d Ufwartig mache.
Und so het er sich spontan entschiede, nach Chrütlige z fahre.
D Charlotte het ihm by sym letschte Bsuech sowiso e chli e
abkämpfte Ydruck gmacht, und de cha es ja nid schade, wenn er
ume eis nach der Madame luegt.
Natürlich het si nie gchlagt, das würd si nie mache, aber si isch
bleich gsy, das ewige Zangge um Bsitz und Gäld und Rächt setzt
ire zue. Aber si cha nid anders, dass weiss o der Dokter Bluem.
Es verschmitzts Lächle huschet itze über das Gsecht, wo
vorhär no het wölle vo Träne nass wäre. Nie, gar nie würd er
ufhöre, d Charlotte z verehre. Und er het es früecher durchus
gnosse, wenn si im Winter i irem Stadthuus näbe dranne het es
paar Wuche Ferie gmacht und chli het Läbe i di süsch so stilli
Gass brunge.
D Sunne bländet ihn und er het itze d Hang über d Ouge, wo
er ganz uf d Strass use steit u chli verzwyfelt Usschou nach sym
Outo het. Wo zum Gugger het er scho ume parkiert? Sys
Gedächtnis isch schlächter worde ir letschte Zyt und er muess
sech richtig zämerysse, dass er di vorgestregi Heifahrt i Gedanke
sorgfältig cha rekonstruiere, dass ihm o ume i Sinn chunnt, wo er
sy Wage het parkiert.
28
