Leseprobe Bänziger lügt! - Flipbook - Seite 3
Öppis zur Mundarträchtschrybig
Erchlüpfet nid!
We di Gschicht ir Stadt oder im Umfäld vor chli ghobnigere
Schicht spilt, tönt si angers, als we d Landlüt am Drücker sy. U
di Lüt, wo ufem Land sy sozialisiert worde u itze ir Stadt läbe –
oder umgekehrt – mache es Chrüsimüsi. Wi im richtige Läbe.
By de Mehbessere isch es de öppe so, dass am Himel der Mond
schynt und es si dünkt, dass alli sölle hälfe. Ufem Land schynt
der Mond vom Himu u es düecht seye, dass aui söue häufe.
Derzue folgt d Rächtschrybig vor Bärner Rose nid gäng stuure
Regle, sondern sehr oft eifach em Klang. U das gseht de so us:
Der Puur wohnt imne Purehuus u louft itze grad düre Husgang
uus. Aber usem Huus ghört är e Päägg, drum geit er zur Hustür
y, ume iche. Er erchlüpft chli, wo er der Chlyn gseht, usw.
Ds Binde-n laat d Rose öppe ganz wäg. U o SCHT oder ST isch
gäng so e Frag: Am Aafang vore Silbe nume ST, auso Stude o
oder o Spinnele, ir Mitti SCHT, auso Moscht oder Mischt. Aber
o da entscheidet mängisch der Klang. U vor allem o d
Läsbarkeit. Konsonante-Verdoppelige am Aafang vomene Wort,
auso er het bbrichtet, si het bbache, es isch bbluemet, chöme
nume sälte vor, o we d Regle vilech no meh täte vorschrybe.
Ach ja, u di Gschicht isch natürlich erstunke u erloge.
Si gfallt öich hoffentlich glych!
Mir fröiie üs uf Rückmäldige!
mordsmundart@bluewin.ch
3
