Leseprobe Bänziger lügt! - Flipbook - Seite 30
sy, wenn dä zerströiti Profässor das bis morn scho ume vergässe
het.
Er rysst d Hingertür vo sym Wage uf und packt e dicki
Akteggufere und stabet dervo. No einisch ergryft der Dokter
Bluem z Wort: «Ig wott zur Charlotte hüt, söll ig ire e Gruess
usrichte?»
Fischer drääjt sech es letschts Mal um, bevor er endgültig i eim
vo de Hüser verschwindet. «Oh ja, bitte, Norbert», lächelt er,
«grüess si ganz härzlech vo mir. Und richt ire bitte us, dass der
Brief wi versproche vor zwöi Täg use sygi.»
Bluem blybt mit offetem Muu staa. Was fürne Brief? Was het
dä Carl o nume so z hetze! Er het bestimmt wider es Renne mit
eire vo syne junge Fründinne, probiert sech der Dokter Bluem
sälber e Erklärig z gää. Grad letschtens het er gseh, wi der Fischer
zmitts ir Nacht e so es jungs Ding het dürs Stägehuus zoge. Aber
er het leider nüt Gnauers chönne erspähe, obwohl dass es ihn
schuderhaft hätti Wunder gno.
Sicher, der Carl isch ersch Ändi Füfzg, auso guet zäh Jahr
jünger als er sälber. Aber es dünkt ihn glych, der Awalt übertrybis
chli mit syne Frouegschichte. Syt er sech vor paar Jahr het laa
scheide, het der Jurist offebar gar nüt meh laa aabrönne.
Aber vilech bin ig ja eifach yfersüchtig, dänkt Bluem und
lächlet zögerlich, wo er ändlech i sys Outo stygt. Immerhin darf
ig itze es paar Stunde mit der Charlotte verbringe, überleit er. Das
isch e grosse Troscht!
Weu er vil z vil Gas git, hüület der Motor vo sym Golf uf.
Allerdings, sinniert er wyter, anstatt sech uf das cheibe Outo z
konzentriere, allwäg ich es unmüglech, di Nuss no z knacke.
30
