Leseprobe Bänziger lügt! - Flipbook - Seite 33
4
Wo er fasch e Stund später ändlech dür Chrütlige fahrt, wird es
ihm ganz warm ums Härz. Das chlyne Dörfli steit ufere sunnige
Hochäbeni, wo stattlechi, schöni Hüser mit breite Dächer grüesse,
als hätte si nume uf si Bsuech gwartet.
Scho vo wytem gseht me o ds Schlössli, wo chli trotzig uf eme
Högerli überem Dörfli steit. So vil der Dokter Bluem weiss, steit
dä Herresitz scho syt em Mittelalter dert und isch früener nume
als Jagdschloss u Summerresidänz vo de Aristokrate gnutzt
worde. Syt meh als drühundert Jahr isch es itze scho im Bsitz vo
de Vontobler. Vor allem der Ludwig, e ehemalige Schultheiss, isch
e berühmte Spross gsy us dere Familie. Fasch 80 Hektare Wald
und Land ghöre derzue. Oder angers gseit: E Sächstu vo Chrütlige
isch in Vontobler Bsitz.
Nid z letscht wäge dessi isch es klar, dass d Strytluscht vor
Charlotte nid gärn gseh wird. Dass me sech ergeret, dass so vil
Gmeindsflächi nid zuegänglech darf sy. Velofahre, ryte. pilzle,
male, fotografiere, es Füürli mache, umehöckle u d Ussicht
gniesse, wehe däm, wo das macht und nid tschegget, dass er der
Schlössli-Bsitzere mit settigem Frävel i d Queri chunnt oder sogar
uf d Füess tschalpet.
Der Dokter Bluem verlangsamt syni Fahrt und kurblet d
Schybe abe. Das muess er bi sym alte Golf no vo Hand mache.
Vor em «Bäre» isch wi jede letscht Donnstig im Monet Märit. Der
Platz isch überstellt mit klapperige Holzständ, wo d Puure und d
Imker und d Hobbybaschtler iri War aabiete: Gmües, Eier,
Blueme, Gonfi, Sirup, Chäs u Wurscht, glismeti Socke, Brot und
33
