Leseprobe Bänziger lügt! - Flipbook - Seite 34
Turte und Güetzi und allergattig Trödlerzüg und Ramsch lige
parat und schyne d Lüt aazzieh. Nid nume di us Chrütlige. Meh
und meh Lüt us der Stadt und der Agglomeration fahre am
Donnstig gärn es paar Kilometer, zum hie ga z chrämere, ga z
gänggele, ga z schnöigge oder o nume drum, um der nöischt
Chlatsch z vernää. Entsprächend vil Outo stöö entlang vo de
Strasseränder und ufem grosse Parkplatz hingerem «Bäre».
Der Dokter Bluem het sech das Sortimänt us luter Gwunder o
mal aagluegt u sech gfragt, wi all di Baschtler und Lismerinne mit
däm Züg o nume ei rote Rappe chönne verdiene.
Nid, dass er der ländliche Kultur grundsätzlich abgneigt isch,
aber so e Huch vo Gschmack het er doch erwartet. Es gruuset ihn,
wenn er dra dänkt, wi ihm mal sone dicki Püüri het wölle e
sälberglismete Ermellos aaträäje. Wäger, er treit di sehr gärn!
Aber das unförmige Brätt het zimlech vil usgseit über di
handwärchlechi Begabig vo dere Frou. Und no e Blinge hätti
gseh, dass di Farbkombination vo däm Pulli so öppis vo
gschmacklos isch. Drum het er denn dankend abglehnt. U prompt
e Schlütterlig kassiert. Nid e füechte, aber e verbale scho. Das
Froueli het besser chönne flueche als e Holzfäller und het e
Surnibel gmacht, dass es ihm fasch isch Angscht u bang worde.
Jänu, het er denn dänkt, ufs Experimänt Chrütlige-Märit muess ig
mi ja nid nomau ylaa. U glych, das Trybe fasziniert ihn o hüt.
Eifach mit der nötige Distanz zu de Hobbyhandwärcherinne.
Anders isch es bi de Läbesmittel. Eier, Chäs u Hungg bsorget
er liebend gärn a sym Lieblingsstand vor em «Bäre». Und näbe
dranne laat er sech gärn o mal e Salat und es paar Rüebli la
ypacke, wenn er ds Gfüu het, er wett gärn ume eis richtig choche.
34
