Leseprobe Bänziger lügt! - Flipbook - Seite 36
Wi o immer, dänkt der Dokter Bluem. Di Sophie söll sech
nume Zyt laa bym Haarschelm und ufem Märit mit de Ychöif.
Das macht ihn gar nid unglücklich. So het er meh Zyt, um der
Charlotte ufe Zahn z füele. Er lächlet und git ume chli meh Gas.
Dass Samuel ihn chönnti störe, a das dänkt er nid. Dä Chrouteri
wird irgendwo im Garte gruppe und jäte und Sälbstgspräch füere.
Nei, syni Teestund byr Charlotte Vontobler isch nid in Gfahr. Er
git no meh Gas und chratzet das churze Strässli zum Schlössli ufe.
Wo er vors Tor chunnt, stuunet er, dass das no zue isch. Samuel
bschliesst ir Regel uf, sobald er am Morge i Garte chunnt und zur
Poscht geit.
Der Dokter Bluem brämset, stellt ds Outo vor em schmidysige
Tor ab und stygt us. Er nimmt e Stei und döppelet dermit
vorsichtig a d Ysestäb, so, dass si ja ke Schade nää – aber doch e
Ton entsteit. Er dänkt, dass der Gärtner vilech uf chaltem Entzug
sygi u drum nid richtig funktionieri. Doch o nach em dritte
Chlopfe regt sech nüt im Schlosshof. Eigenartig! Der Dokter
Bluem isch fasch e chli beleidigt und überleit ärnschthaft, grad
ume heizue z fahre. We me doch nid willkomme isch!
Er steit no es Momänteli desume, reckt i d Täsche vo syre
weiche Strickjagge und taschtet nach em chlyne Päckli, wo er für
d Charlotte derby het. Nüt Apartigs, nume paar Mandelbärli.
Di wird doch nid öppe i d Stadt gfahre sy? Aber nei, das hätti
doch der Carl gwüsst und ihm gseit. Und abgseh dervo, verlaat si
ires Rych nume no sälte i Richtig Stadt. Für sehr, sehr wichtegi
Gschäftstermin. D Termine mit irem Awalt haltet si syt paar Jahr
lieber im Schlössli ab, dermit niemmer ir Stadt gseht, wi vil si dä
muess konsultiere.
36
