Leseprobe Bänziger lügt! - Flipbook - Seite 37
Der Dokter Bluem schlycht um d Schlossmuur um und
entscheidet sech, vo hinde düre Park zur Ygangstür z cho. Weu er
nid der ganz Wäg dür d Allee mag mache, chraxlet er uf halber
Strecki chli abentürlech übers Börtli uf. Das choschtet ihn
unverschämt vil Chraft, und wo er ändlech dobe ir Allee steit,
muess er ane mächtegi Linde aalige und verschnuppe. Syner
wysse Haar, wo er scho gäng e chli z läng treit für syni Härkunft
und Schicht, chläbe ar Stirn und im Äcke. Er taschtet mit sym
rächte Arm d Bei ab und realisiert ersch itze, dass er vil z warm
aagleit isch mit sine olivgrüene Kordhose und em dicke
Rollchrage und der Strickjagge. Winterchleider, blitzt es i sym
Chopf uf, wi pynlech isch de das!
Er schlüüft hurti us em Jäggli, wo ihm klar wird, wi d Charlotte
über syni deplatzierti Ufmachig chönnti spotte. Er schämt sech.
Wo er aber ds Jäggli ganz galant übere Arm leit, het er grad ume
es bessers Gfüu. Das gseht doch scho vil besser us, tröschtet er
sech und macht ändlech Aastalte, wyterzloufe. Aber es dünkt ihn,
syner Chnöi sige us Gummi. Wenn ig doch nume der Stäcke hätti
mitgno, balget er mit sech sälber. Aber es isch äbe o so, dass er
syre Charlotte nid wott mit Stäcke unger d Ouge träte. Was würd
di dänke! So cha er doch ire nid der Hof mache. Ach, di Eitelkeit!
Aber er wott vor der Charlotte als potentielle Partner ufträte. Und
nid als Pflegefall. Was fürne grouehafte Gedanke!
Und drum rysst er sech zäme und stapft wine Soldat mit
schwäre Schritt i Richtig Schlosshof, marschiert zielstrebig wine
General uf ds Schlössli zue. Wo er im Park aachunnt, muess er
lache. Allneort stöö Voguschüüchine bi de Obschtböim und i de
37
