Leseprobe Bänziger lügt! - Flipbook - Seite 38
Bluemebeetli. Strubi Gselle, wo bi windigem Wätter
wahrschynlech e furchtbare Lärm mache.
«O i dere Hinsicht isch d Charlotte knallhert», brümelet er und
schüttlet schier unmerklich der Chopf. Nid eis Beeri würd si
kampflos abgää!
Umso meh wunderet er sech, dass sech d Charlotte mit em Sir
John e verfrässnigi Chatz leischtet, wo ja vor allem Chöschte
verursacht. Der Dokter Bluem streckt der Hals und luegt, ob der
Moudi amne Ort ume isch. Aber was fürne Jammer! Syner Ouge
si nümm vil besser als d Chnöi und d Hüft und d Bei!
Er umrundet ds Schlössli itze ganz langsam, er wott syre
Härzdame ja nid usser Atem unger d Ouge träte. Ersch itze merkt
er, wi unnatürlich still alles isch, ke Vogel ghört er, ke Grille,
eifach nüt. Kes Raschle. U scho gar ke Mönscheseel.
Dass d Sophie nid da isch, weiss er ja. Aber dass d Charlotte
und Samuel ono usgfloge sy, das dünkt ihn eher komisch. Er het
ume still, lost. Nüt! Es isch so still und troschtlos wi daheim ir
Wohnig, am Abe, we ds Läbe ir Stadt isch ygschlafe und er sech
nach syre Lisette sehnt. Oder nach angerer Gsellschaft.
Furchtbar! O hie isch es still u irgendwie beklemmend.
Er zögeret und schlycht wyter. De ändlech! Bym Brunne vorne
isch d Charlotte, si bückt sech übere höch Brunnerand. Si treit irer
blaue Arbeitslatzhose, wo er so gärn gseht a ire. Si stöö ire besser
als jedes Kostüm! Ufem Chopf het si ire uralt Strohhuet. Es
herrlichs Bild! Wenn er e Künschtler, e Maler wäri, de würdi er
genau das male, genau eso!
Er räusperet sech, aber si reagiert nid. No gäng hanget si übere
Brunnerand y. Ob ire öppis isch abegheit, fragt er sech? Der alt
38
