Leseprobe Bänziger lügt! - Flipbook - Seite 40
5
Em Sebastian Bänzigers Chopf isch mittlerwyle meh lila aus rot.
Wo gäge di Elfi der Aaruef vom Norbert Bluem isch ygange, isch
er grad dranne gsy, sym Computer e Sieg im Schach abzringe.
Das isch ir Regu ds Erschte – u oft ou ds Einzige - was er macht,
we er i ds Büro chunnt. Hüt isch er allerdings chli spät dranne gsy,
weu ihn sy Fründ, der Carl, umne Uskunft zur wüsseschaftleche
Ermittligsarbeit, wo für ihn grad fallrelevant sygi, gfragt het. Der
Bänziger isch fasch platzt vor Stolz, dass er het chönne mit sym
halbbatzige Wüsse bezüglich Kriminaltechnik glänze. Er, der
Sebastian Bänziger.
Und itze donneret er syt zwöi Stund wine tobsüchtige Muni
dür d Ysatzzentrale und trummelet alli mügleche Lüt zäme, nume,
um si es paar Minute später ume zum Büro us z schüüche. Der
Kommandant isch für paar Täg imne Seminar. Und er isch
tatsächlech richtig Vize und nid nume ufem Papier, wi das süsch
immer der Fall isch. Ja, und itze muess und sött er d Stellig halte!
Der Schweiss rünelet ihm us allne Löcher, sogar im Füdlespalt
hinger gspürt er, wi es Bächli abwärts geit. Syt er cha dänke, het
er sech das gwünscht, genau das! Nid ds Schwitze, aber das, dass
er einisch, nume einisch im Läbe, cha di erschti Gyge spiele. Und
nid nume d Arschgyge isch. Glychzytig aber lähmt ihn d Angscht
vorem Versäge dermasse, dass er unfähig isch, o nume ei Gedanke
fertig z dänke. Ou das isch öppis, wo ihn syt syre früechschte
Chindheit begleitet u plaget.
Und das alles usgrächnet hüt. A däm dänkwürdige Tag, het er
am Zwöi e Termin bi syre politische Vorgsetzte. Das isch ihm syt
40
