Leseprobe Bänziger lügt! - Flipbook - Seite 41
Tage z wider, aber er cha das ja unmüglech eifach la platze. O
wenn er felsefescht dervo überzügt isch, dass di Dame ihn hasset.
Anders chan er sech di ständig Kritik nid erkläre. Syni Position
isch, obwohl faktisch nid vil meh als e Farce, offebar sehr
umstritte. So dumm isch er nid, dass er das nid würdi merke. Us
allne Egge isch me dranne, a sym Stuel z sage. Sy Grind passt nid
i das System, das weiss er. O scho syt er e Chlyne isch gsy.
Er probiert mitem lingge Zeigfinger dr Grawattechnopf e chli
lockerer z mache, weu es ihn dünkt, er müessi jedi Minute
ersticke. Es wird ihm übel, churz und heftig. Er ma di Hitz eifach
nümme vertrage. We es nach ihm gange wäri, so hätti me scho
lang chönne e Klimaaalag yboue ufem Kommando. Aber anstatt,
dass di Dame und Herre us der Politik ändlech hätte grüens Liecht
gää fürne entsprächende Kredit, isch di Gschicht dür d Zytige
gschleipft worde und me het sech ganz unverfrore über d Polizei
luschtig gmacht. Es chönni ja nid schade, we ou Polizeibeamti
öppe einisch müesste schwitze, isch gwitzlet worde.
Di hei doch alli zäme kei Ahnig, rumoret es i sym Chopf. Und
er nimmt e Glasfläsche, wo er am Tag vorhär het uftaa und
schüttet sech e Schluck vom abgstandne Wasser i Äcke. Er hoffet,
das mögi d Hitz e chli usem Körper jage. Aber meh als es Gsou
git es nid.
Irgendwie würdi er so gärn sälber nach Chrütlige fahre. Und
glych gruuset ihm dervo und schlussändlech isch er fasch
glücklich, dass er e Usred het. Ihn het es scho gäng gruuset, we
me sech het müesse vor Ort um Verbräche kümmere. Und das isch
mit zuenähmendem Alter nid besser worde.
41
