Leseprobe Bänziger lügt! - Flipbook - Seite 8
Richtig chönnt erglüüssle, um der Vontobler e Strick z drääje.
Aber wi um Gottswille sött er so öppis bewyse? Er cha ja nid
eifach is Schlössli iche spaziere u ga unger d Dechine luege oder
uskundschafte, i welem Zimmer di Söffe, di alti, graui, hässelegi
Gouvernante vor Madame, schlaaft.
U uberhoupt, uf derigs dumms Gschwafu vo de Dorfwyber cha
u wott er sech nid verlaa. We er sech das nämlich genau uberleit,
cha i däm ganze Kaff niemmer wüsse, was sech hinger de dicke
Muure vom Schlössli aus abspilt.
U er Vontoblers noble Fründe us der Stadt sy nid gsprächig, we
si nach Chrütlige chöme. U d Söffe, di Bedienschteti, liess sech
ender e Schlitz i ds Füdle houe, aus dass si o nume es Wort tät
usploudre. U Sämu, der Gärtner, wo näbe dene zwöine Wyber der
einzig Bewohner im Schlössli isch, isch e verdammte
Chnuppesager u chrääjt höchstens d Blueme aa, we er z viu
Härdöpfler gsoffe het.
U de git es nume no der Sir John. Aber das isch e Chatz. E
verflüemeret eifältige Name für so es Vieh! Aber das passt!
Reischt hudlet der Gring. Sir John! So e Blödsinn! Aber uf jede
Fau isch dä verfrässnig Moudi ke Schlössli-Spion, wo me chönnt
bruuche. Reischt isch sech sicher, dass das Chatzebyscht ds
einzige Gschöpf uf dere Wäut isch, wo vo däm ryche Froueli ohni
Wenn u Aber akzeptiert u ghätschelet wird.
Er ma gar nid a das soudumme Affetheater däiche, wo d
Vontobler im letschte Summer het abglaa, weu er däm
Chatzevych mit syre Sägesse isch z naach cho. Nid äxtra, wäger
nid! Aber wi hätt er das söue erkläre! Er het ds Börtli gmääjt unger
der Allee, u sech wäger nid kümmeret, ob i däm töife Höiigras no
8
