Leseprobe Bänziger lügt! - Flipbook - Seite 9
chönnt e Moudi schlafe. U chuum het Reischt einisch usghout
gha, het es scho gweisset u d Chatz isch mit eme grosse Satz us
em Gras gumpet. Der Sir John het es Hickli gha im Schwanz u
Reischt hätti sech no hüt chönne chläpfe, dass er das Malör isch
gaa bychte. Gschider hätti er gschwige!
Uf jede Fall het das Wyb möge tue wine Furie u o es Jahr speter
bhouptet dä Drache no gäng, dass Reischt nid nume irer Chatz,
irne Bedienschtete, sondern o ire pärsönlech nach em Läbe
trachti!
Es Zetermordio het di Vontobler abglaa, het pääget, er syg e
unflätige Möntsch. U siderhär stöö si, auso d Söffe oder Sämu,
Wach, we er i d Neechi vom Schlössli chunnt cho wärche. U das
isch fasch au Tag der Fau, schliesslech isch er syt viune Jahr
Pächter vom Schlössliguet.
Reischt steckt d Häng i d Hoseseck u wüelet u grapschet drin
ume, ohni z wüsse, was er eigentlich suecht. Es isch e Blödsinn
gsy, zmitts ir Nacht us de warme Fädere z schlüüfe u zum
Schlössli ueche z schlyche, das gseht er itze y. Aber schlafe het er
ja o nid chönne.
Gäng, we er ygnickt isch gsy, isch ihm di Häx Vontobler
erschine. U jedes Mal isch er ufgjuckt, het sech hin- u härgwäuzt,
het Schäfli zeut u probiert, syner Gedanke i ne schöneri Richtig z
länke. Zur Mane zum Byspil, zu der nöie, flotte Ushilf im «Bäre»
äne. Aber es isch für d Chatz gsy. Gäng und gäng ume, wenn er
der Manes fröhliche Lockechopf vor sys geischtige Oug het
ghout, isch dä Vontobler Drache uftoucht. Schliesslech het er es
nümme usghaute. So lyseli wi mügli isch er us em Bett ggraagget,
9
